Na My Teacher Make Me Who I Be Today! By Orere Israel
A, B, C, D, na so I take start
From person wey no sabi spell him name
From person wey no sabi add two and two
Na him don big now
I no go ever forget the times when I dey struggle
You stand by me,
You go explain until I understand
My teacher, your patience and love dey special
You no only teach me book, you teach me better behaviour
You go punish me when I do bad
From there I start to dey learn wetin good and wetin bad
To avoid punishment, I start to dey behave myself
Those times, I no know say you dey train me
You dey build me so tomorrow I go fit stand kakaraka
Today, my life don better because you teach me better behaviour
Anytime I achieve anything today
My mind dey carry me back to the work wey all my teachers do for my life
They teach me say if I no dey determined, I no fit achieve anything
My teacher tell me say failure no be the end
Them talk say if I fail, make I dust body try again
Today I no dey fear learn anything
I no dey fear do anything
I know say failure and success dey hand in hand
Last last, I go reach my goal
To all my teachers wey don touch my life
God go bless you
This poem by Orere Israel emerged as a winning entry (top 10) in the Mrs. Felicia Ighoroje Memorial Celebration 2022 organised by PositiveNaija.
Orere Israel
My name is Israel Oghenefejiro Orere. I am a Chemical Engineering student at the University of Lagos. I am passionate about learning new things every day.
